LAOAG CITY – Natay ti maysa a lalaki kalpasan ti panagbekkel na iti ili ti Bacarra.
Segun kenni Police Major Arnel Tabaog, ti chief of police ti PN-Bacarra, ti biktima ket agtawen ti 30, addaan ti live in partner, maysa a mannalon ken residente iti nadakamat nga ili.
Inbatad na a nakita laengen ti ina ti biktima a nakabitin ti anak na iti puon ti mangga, 30 a metro ti kaadayo na manipud iti pagtaengan da.
Dagus a naitaray ti biktima iti Bacarra Medical Center ngem indeklara a dead on arrival ni Dr. Stephanie Malapit.
Inlawlawag na a basar iti imbestigasyon da, nagsina ti biktima ken ti live-in partner na nga isu ti rumrumuar a rason ti panagbekkel na.
Innayon na nga addan ti pananggandar ti biktima nga agpakamatay no sadinno ket namindua a daras nga imminom idi ti insecticides.
