LAOAG CITY – Kinumpirmaran ni Fire Senior Inspector Ronald Castillo, ti fire marshall ti BFP-Laoag nga adda ti maysa a nasugatan iti napasamak nga uram iti maysa a pagtaengan iti Brgy. 30-A Suyo ditoy ciudad.
Binigbig na ti agtagikua iti pagtaengan a ni Irenio Galapon, agtawen ti 60 idinto a ti nasugatan ket ti anak daytoy a ni Rene Galapon ken nagsagaba ti second degree burn, agtawen ti 43.
Segun kenni Castillo, itay 9:45 itay bigat ket adda ti naawat da a report nga adda ti mapaspasamak nga uram rason a dagus da a nagresponde ken naideklara a fire out kalpasan ti tallo a minutos.
Kunana a basar iti imbestigasyon da, namunganay iti pannakauram ti improvised a paglutwan a maikkan ti krudo no sadinno ket rumrumwar a nag-leak a rason ti uram.
Inbatad na a karaman kadagiti nauram ket ti washing machine, badbado a nakasalapay iti asideg ti nakapasamakan ti uram ken dagiti waywaya ti kuryente.
Agtultuloy met ti imbestigasyon tapno madeterminar ti balor dagiti nadadael iti nasao nga uram.
