LAOAG CITY – Nagsagaba ti sugat iti rupa ken likod ti maysa a lalaki iti napasamak a pammagkong iti Brgy. Sta Cruz Sur iti ili ti Badoc.
Ti biktima ket addaan ti umno a tawen, naasawaan, residete iti Brgy. Sta Cruz iti ili ti Badoc idinto a ti suspek ket agtawen ti 39, naasawaan ken residente iti Brgy. Pasuc iti met laeng nasao nga ili.
Basar iti imbestigasyon ti Philippine National Police (PNP) iti ili ti Badoc, rumrumuar nga immuna a pinuuran ti biktima ti tricycle ti suspek.
Nupay kasta, kabayatan a maiyur-uray dagiti personnel ti Bureau of Fire Protection (BFP) ket maipagarop a nagsubang ti suspek ken biktima iti baet nga addan ni Bgry Chairman Palapox.
Naamoan a namindua daras a binagkong ti suspek ti biktima a nakatamaan ti rupa ken likudna.
Naitaray ti biktima iti Sinait District Hospital para iti naan-anay a pannakataming na.
Agtultuloy ti imbestigasyon dagiti otoridad tapno maamoan no ania ti makaigapu no apay a pinuuran ti biktima ti tricycle ti suspek a mabalin nga isumet ti nagpungtotan ti naud-udi rason a nabagkong na daytoy.
