LAOAG CITY – Natagbat ti ulo ti maysa a lalaki idi rabii babaen met laeng iti kabsat na iti Brgy. 56-B, Bacsil South, ditoy ciudad ti Laoag.
Daytoy ti inbatad ni Police Major Carlo Abing, Deputy Chief ti PNP-Laoag.
Ti biktima ket agtawen ti 46, naasawaan, idinto a ti suspek ket agtawen ti 43, naasawaan, agpada a mannalon ken residente iti nasao a barangay.
Iti inisyal nga imbestigasyon, namunganay ti nasao nga insidente kalpasan a napan ti biktima iti pagtaengan ti suspek nga adda iti impluwensya ti nasanger ken nagisawang ti dakes a sarita.
Gapo iti daytoy, nakapungtot ti suspek rason a napan nangala ti sampilok nga agatiddog ti 16 a pulgada ken tinagbat na ti kabsat na.
Dagus met a naitaray ti biktima iti Governor Roque B. Ablan, Sr. Memorial Hospital para iti pannakataming na.
Kabayatanna, awan metten ti plano ti biktima a mangipila ti kaso kontra ti kabsat na a suspek.
