LAOAG CITY – Nasugatan ti akin-kannigid a paset ti ima ken ulo ti maysa a lalaki iti napasamak a pammagkong iti Brgy. 51-A, Nangalisan East ditoy ciudad ti Laoag.
Ti biktima ket agtawen ti 23, baro ken taga Brgy. Magrapil, Gonzaga, Cagayan idinto a ti suspek ket agtawen ti 23, addaan ti live-in partner, taga Brgy. Cabaritan Zone 7, Buguey Cagayan, ngem agpada dagitoy nga agnanaed iti agdama iti Brgy. 51-A Nangalisan ditoy siudad ti Laoag.
Basar iti maysa a testigo, bayat nga agpada a nakainom ti biktima ken suspek ket naaddaan da ti nabara a diskusyon iti mismo a barracks da a nagtungpal ti napasamak a pammagkong.
Intaray dagiti nagresponde a barangay tanud ti biktima iti Gov. Roque B Ablan Sr. Memorial Hospital para iti naan-anay a pannakataming na.
Nakumpiskar dagiti otoridad iti nakapasamakan ti krimen ti tactical knife nga agatiddog iti 9.5 inches a maipagarop nga inusar ti suspek a nangbakong iti biktima.
Iti agdama, maisagsaganan ti maipila a kaso a frustrated homicide kontra iti suspek.
