LAOAG CITY – Nasugatan ti maysa a lalaki, addaan ti umno a tawen ken residente iti Barangay Sta. Rosa ditoy ciudad ti Laoag kalpasan a napilitan ti maysa a kameng ti Philippine National Police a nangpaltog kenkuana.
Basar iti maysa kadagiti residente iti nadakamat a barangay a nakasarsarita ti News team ti Bombo Radyo Laoag, pasado alas-otso ita a bigat ket karkaryaren ti biktima ti pamilya gapu ta maipagarop a saan a makadawat ti kwarta.
Naamoan a kasangsangpet laeng ti biktima iti manipod iti papanna panag-casino ken rumuar-sumrek iti rehabilitation gapu ta nangina ti pagpa-rehab ken saan a kabaelan ti pamilya na.
Gapu ta saanda a maanawa ken mapagsardeng ti biktima ket nagpatulong ti pamilya iti Philippine National Police.
Iti panagresponde dagiti otoridad ket saan latta pulos a maanawa ti biktima ken maipagarop a ginandat na a labanan dagiti kameng ti pulisya isut gapuna a napilitan ti maysa a nangpaltog kenkuana.
Intaray met a dagus dagiti otoridad ti biktima iti ospital para iti pannakataming na.
