LAOAG CITY – Nasugsugatan ti maysa a lalaki kalpasan a nadesgrasya iti Brgy. Pila ditoy ciudad ti Laoag.
Segun ken ni Police Staff Sergeant Alexson Rosal, ti Duty Desk Officer ti Philippine National Police – Laoag Traffic Division, ti biktima ket ni Jessie Tungpalan a residente ti Brgy. 60 Madiladig ditoy ciudad.
Inbatad na a kabayatan ti panangiturong na ti motorsiklo na nga Honda Wave Dash nga agmaris ti nalabbaga ken nangisit ket napukawan ti kontrol iti manibela.
Gapu iti daytoy, nagsagaba ti sugat iti nagduduma a paset ti bagi ti biktima kangrunaan iti ulo na ken ti akin-kannawan a saka na ket natukkol.
Naitaray iti Governor Roque Ablan Sr Memorial Hospital ti biktima para iti naan-anay a pannakataming na.
Rumrumuar a ti biktima ket adda iti impluwensya ti nasanger idi napasamak ti desgrasya ken naggapo iti paggiinuman kalpasan ti trabaho na.
Kunana nga immuna a nakaturog ti biktima iti pagiinuman ngem idi nakapuot ket inpilit na nga agawid iti laksid a nabartek pay daytoy.
