LAOAG CITY – Nasugsugatan ken natukkol ti saka ti maysa a lalaki kalpasan a naidungpar iti elf truck ti inturong na a motorsiklo iti national highway bisinidad ti Brgy. 12 iti ili ti San Nicolas.
Nabigbig ti biktima nga adda iti legal nga edad ken residente iti Brgy. 17 iti nasao nga ili idinto a ti nangiturong ti elf truck ket agpapaay iti Brgy. 19 ngem tubo iti probinsya ti Apayao.
Basar iti imbestigasyon ti PNP-San Nicolas, agpapaamianan a direksyon ti truck idinto a ti motorsiklo ket agpaabagatan a direksyon.
Kabayatanna, iti panagleft-turn ti truck ket dita a nagdinnungpar dagit dua a behikulo.
Gapu iti daytoy, naipurwak iti sango ti truck ti driver ti motorsiklo rason a nasugatan ti ulo na ken natukkol ti saka na.
Nagtalinaed ti driver ti motorsiklo iti Mariano Marcos Memorial Hospital and Medical Center iti siudad ti Batac idinto a saan a nagsagaba ti aniaman a sugat ti driver ti truck.
Rumrumuar nga adda iti impluwensya ti nasanger ti driver ti motorsiklo idi napasamak ti insidente.
