LAOAG CITY – Natay ti maysa a lalaki a driver ti motorsiklo idinto nga agtultuloy a maag-agasan iti ospital ti lubbon na kalpasan a nadesgrasya da iti paset ti Brgy. Poblacion 2 iti ili ti Currimao.
Naamoan a ti driver ti motorsiklo ket agtawen ti 22, baro ken residente iti Brgy. Tabug iti ciudad ti Batac idinto a ti lubbon na ket addaan metten ti umno a tawen ken residente iti Sitio Mabalin iti Brgy. Colo iti metlaeng nasao a ciudad.
Basar iti imbestigasyon ti Philippine National Police iti ciudad ti Batac, agpapaamyanan ti motorsiklo idinto a napukawan ti kontrol iti manibela ti driver a nangitunda iti pannakaidungpar da iti Araucaria tree.
Gapu iti daytoy, nagsagaba ti nakana a sugat iti nagduduma a paset ti bagi dagiti biktima no sadinno a naitaray da iti Mariano Marcos Memorial Hospital and Medical Center ngem naideklarar pimmusayen ti driver ti motorsiklo.