LAOAG CITY – Inbatad ni Police Capt. Melvin Soriano, ti chief of police iti ili ti Currimao a pimmusay ti maysa a lalaki a nangiturong ti Yamaha Sniper kalpasan a nadisgrasya iti Barangay Torre iti nasao nga ili.
Binigbig na ti biktima iti nagan a Raniel, agtawen ti 23, residente iti Barangay Labut iti ili ti Badoc.
Inlawlawag na a basar iti imbestigasyon, naggapo ti biktima iti paggiinoman iti maysa a nalatak a pagpasyaran iti ili ti Currimao.
Kuna na a kabayatan ti panagpaabagatan ti biktima ket saanna a nakontrol ti motorsiklo na kabayatan a nadanun na ti agkurba a paset ti kalsada iti nadakamat a barangay gapu iti kinapardas ti panagpataray na.
Gapu iti napasamak ket timmama ti ulo ti biktima iti iking ti poste a nagresulta ti pannakatay na a dagus.
Innayon ni Soriano nga awan ti suot nga helmet ti biktima idi napasamak ti insidente.
