LAOAG CITY – Natay ti maysa a lalaki a nagkedked a mapan ospital kalpasan a maipagarop a pinang-or ti mismo a kasinsin na idiay Brgy. Caparispisan iti ili ti Pagudpud.
Nabigbig ti biktima a ni Donald Duques, 33, baro, maysa a utility worker; idinto a ti suspek ket ni Arnel Roberto, 33, addaan ti live in partner, ken agpadada a residente iti nasao a lugar.
Segun ti inisial nga imbestigasyon ti pulisya, bayat nga agin-innum ni Duquez kadwana dagiti nasinged a kabagyanna ket dimmanon ti nabartek a suspek iti lugar ken dita a pinangpang-orna ti namin-dua a daras ti nasao a biktima usar ti tubo.
Nagsagaba ni Duquez ti nagduduma a sugat iti paset ti bagina ngem nagkedked daytoy a mapan agpaagas iti ospital.
Mainaig iti daytoy, nakigtot ti ina ti biktima gapu ta nakitana a natayen ni Duquez idi parbangon kalman.
Iti agdama, nagtalinaed iti kustudyar ni Roberto para iti naan-anay a disposisyon kenkuana.
