LAOAG CITY – Natay ti maysa a lalaki kalpasan a naregreg iti derraas kabayatan ti papanna koma panangisalakan ti kasinsin na a nadesgrasya ken naisalapay ti motorsiklo na iti kayo iti paset ti Sitio Maligligay, Adams-Pancian Road iti ili nga Adams.
Binigbig ni Police Captain Artemio Clemente, ti chief of police iti ili ti Adams ti natay a biktima a ni Raymund Reyes y Ortega, agtawen iti 35, construction worker idinto a ti nadegrasya a kasinsin na ket ni Mark Anthony Ortega, agtawen iti 31, naasawaan, bus conduktor, agpada dagitoy a residente iti Barangay Pancial iti ili a Pagudpud.
Inbatad ni Clemente nga immuna a naggiinom ti biktima ken dagiti kakasinsin na iti Barangay Pancian iti ili a Pagudpud sakbay a nagturong da iti ili nga Adams.
Nupay kasta, apaman a nadanun da ti Adams-Pancian Road iti ili nga Adams ket ditoyen a napasamak ti aksidente a nakaisalapayan iti kayo ti motorsiklo a nagluganan ni Mark Anthony.
Ginandat ti biktima a mapan isalakan ti kasinsin na ngem dita metten a nakaruskos iti derraas nga addaan ti kauneg a nasurok a 20 a metro a nakaituparan na ti bato ken waig pay iti baba.
Naitaray a dagus ti biktima iti Rural Health Unit iti ili nga Adams ngem naideklara a dead on arrival.
