LAOAG CITY – Natay ti maysa a lalaki kalpasan a nadungpar ti motorsiklo idiay Barangay Billoca iti ciudad ti Batac.
Nabigbig ti biktima a ni Ramon Agapay, agtawen ti 47, naasawan, residente iti Brgy, Billoca iti nasao a ciudad; idinto a ti nangiturong ti motorsiklo ket ni Emerson Butay, agtawen ti 30, baro ken ti lubbon na ni LJ Butay, agtawen ti 20 agpada a residente iti Brgy. 14 Bungon iti nasao a ciudad.
Segun ti imbestigasyon ti PNP, bayat nga agpapa-amyanan a direksyon ti motorsiklo a minaneho ni Butay ket nadungpar na ti biktima bayat iti idadallyasat na iti kalsada.
Dagus a naitaray iti ospital ni Agapay ngem naideklarar a dead on arrival gapu iti sinagaba na a nakaro a sugat iti ulo na.
Nagtalinaed met iti opsital da Emerson ken LJ gapu iti sinagaba da a sugat iti nagduduma a paset ti bagi da.
Naamoan a mapan laeng gummatang ti sigarilyo ti nasao a biktima idi napasamak ti nasao nga insidente.
Kabayatana, rumrumuar a ti drayber ti motorsiklo ket awanan ti driver’s liscense ken awan iti suot da nga helmet.
Agtultuloy ti imbestigasyon dagiti otoridad iti nasao a pasamak.
