LAOAG CITY – Natay ti maysa a lalaki kalpasan ti napasamak a desgrasya iti paset ti Barangay 1, Juan iti ili ti Solsona.
Binigbig ni Police Capt. Chris Anthony Sorsano, chief of police ti PNP-Solsona ti biktima a ni Renol Malvar, agtawen ti 35, maysa a driver, ken residente iti Barangay Parado iti ili ti Dingras.
Iti imbestigasyon dagiti kameng ti PNP-Solsona, kuna ni Sorsano a ti biktima ket naggapo iti Barangay San Marcos iti ili ti Dingras gapo ta napan nagtarimaan ti truck ngem idi agawiden ket napasamak ti desgrasya.
Naamoan a sakbay a makadanon iti Barangay Parado manipud iti Barangay San Marcos ket dumalyasat pay laeng iti sentro ti Solsona.
Segun kenni Sorsano, bayat nga adda iti kurbaan a kalsada ti biktima ken rumrumwar iti imbestigasyon da a napaspas ti panagpataray daytoy ken naidungpar iti puon ti mahogany.
Naitaray ti biktima iti ospital ngem naideklara a dead on arrival.
Inlawlawag ni Sorsano a saan a nakainom ti nasanger ti biktima basar iti palawag dagiti nagapoan daytoy ngem mabalin a gapo iti napalaos a bannog na ket posible a nairidep na bayat nga agmanmaneho iti kotse na.
Kunana a basar pay iti imbestigasyon ket awan ti senyales a napukawan ti preno ti kotse ti biktima gapo ta nagderetso iti puon ti mahogany.
Mainaig iti daytoy, kinumpirmaran ni Sorsano nga iti nakapasamakan ti desgrasya ket maibilang nga “Accident Prone Area” isut gapo na a kiddawen da iti LGU wenno DPWH a manayunan ti warning device ken ti posible a pannakaipan kaadagiti humps.
Kabayatanna, nagpanawagan ti hepe kadagiti motorista a no saanen a kabaelan ti agmaneho ket aginana pay laeng tapno maliklikan ti dakes a pasamak.
