LAOAG CITY – Dead on arrival iti ospital ti maysa a lalaki a nabigbig a ni John Mayrol Valenzuela a residente iti Barangay Upon iti ili ti Pinili kalpasan a nakuryente iti Barangay Tabug iti ciudad ti Batac.
Segun ken ni Police Capt. Angelyn Aguinaldo, ti Deputy Chief of Police iti ciudad ti Batac, napasamak ti insidente kabayatan ti panaginstolar koma ti biktima ken dua pay a kakadwa na ti poste ti solar light iti nadakamat a lugar.
Inlawlawag na a basar iti imbestigasyon da ket natulid ti poste ti solar light ken naitupak iti waya ti kuryente a nangitunda ti pannakapugsat na.
Gapu iti napasamak ket timmama ti waya ti kuryente iti saka ti biktima a nagresulta ti pannakakuryente na.
Inpadas dagiti rescuers a salbaren ti biag ti biktima ngem iti pannakaitaray na iti ospital ket naideklarar a pimmusayen.
