LAOAG CITY – Natay ti maysa a lalaki kalpasan a nalmes iti swimming pool ti maysa a resort iti Barangay Pasngal iti ili ti Bacarra.
Ti biktima ket agtawen ti 36, naasawaan, empleado iti Golden Cow and Catering Services ken residente iti Barangay 12 ditoy ciudad ti Laoag.
Basar iti report, kadwa ti biktima dagiti katrabahoan na a nagturong iti nasao a resort no sadinno a naginom da iti arak.
Naamoan a kalpasan a naginom dagiti agkakatrabahoan ket napanda iti swimming pool tapno agpausaw.
Nupay kasta, inbatad ti maysa a katrabahoan ti biktima a kalpasan a timmapog iti danom daytoy ket saandan a makita a lumung-aw isut gapuna a nagkiddaw da iti tulong.
Naitaray a dagus ti biktima iti Bacarra Medical Center ngem naideklarar a pimmusayen gapu iti pannakalmes.
Awan met ti nakita a foul play dagiti kameng ti Philippine National Police iti ili ti Bacarra iti pannakatay ti nasao a biktima.
