LAOAG CITY – Patien ti pamilya Oliverio nga awan ti foul play iti pannakatay iti maysa a kameng ti pamilya da kalpasan a nalmes iti baybay iti Brgy. Bobon iti ili ti Burgos.
Nabigbig ti biktima a ni Danny Oliverio, agtawen ti 67 ken residente iti nadakamat a barangay.
Segun ken ni Police Corporal Valdimir Domingo, imbestigador iti PNP-Burgos, nagturong iti baybay ti agnagan ti Amante Ancheta, agtawen ti 61 ken residente met laeng iti nadakamat a barangay.
Ditoy metten a nakita ni Ancheta ti nasao a biktima a nakadasay iti igid ti baybay.
Inlawlawag ni Domingo a basar iti imbestigasyon da ket awan ti Comfort Room (CR) ti balay ti biktima ken maipagarop a napan iti igid ti baybay tapno agpaksay ngem possible nga isu metten ti pannakalmes na.
Iti panangeksamen ni Dr. Renzie Godfrey, ti Municipal Health Officer iti ili ti Burgos iti biktima ket indeklarar na a pimmusay daytoy gapu iti pannakalmes na.
