LAOAG CITY – Natay ti maysa a lalaki kalpasan a nalmes iti karayan ti Brgy. San Isidro iti ili ti Dumalneg.
Segun ken ni Police Captain Jackson Sugayen, Hepe ti Philippine National Police iti nasao nga ili, nabigbig ti biktima a ni Mr. Mario Ila y Agustin, agtawen ti 56, residente ti Brgy. Quiom iti siudad ti Batac.
Inbatadna a basar iti insayangkatda nga imbestigasion, dinagas dagiti papagayam ti biktima nga aggapu iti siudad ti Batac manipod iti pagtrabhoanna iti ili ti Burgos ket ditoyda nga inawis tapno mapan agpipiknik iti karayan.
Kunana a sakbay ti insidente ket adda ti naiget a ballaag dagiti Barangay Health Workers kadagiti maseknan nga awan ti mapan tumaptapog gapu ta dakkel ti danum ken nalibeg pay ti karayan.
Nupay kasta, inpalgakna a kalpasan ti sumagmamano nga oras ket nagiinom ti nasanger dagiti agpapagayam agingga a napan dagitoy nagdidigos.
Inlawlawagna a dagiti papagayam ti biktima ket nagdidigos iti narabaw a past ti karayan idinto ti maseknan a biktima ket naikabil iti naadalem a paset iti daytoy a nangitunda ti pannakalmesna agingga a saanen a limmung-aw iti karayan.
Gapu iti daytoy, kunana nga apaman a nakaawatda ti tawag ket dagusda a nagturong iti lugar ti nakapasamakan ti insidente kaduada dagiti kameng ti Bureau of Fire Protection, Municipal Disaster Risk Reduction and Management Office tapno mangisayangkat ti search and rescue operation.
Innayonna a nagpaot iti uneg ti 40 a minuto sakbay a nabirokanda ti bagi ti biktima ken dagusda a nangiyuswat ti Cardiopulmonary resuscitation ken naitaray iti Bangui District Hospital ngem naideklara a dead on arrival.
Kabayatanna, inpakaammo ni Police Captain Sugayen nga adda ti inbaonda a pulis a mapan ag-duty iti nasao a karayan ken manamnama ti pannakaiyuswat ti council meeting babaen ken ni Mayor Francis Espiritu maipapan iti nasao a pasamak.
