LAOAG CITY – Natay ti maysa a lalaki kalpasan a napalto-paltogan iti paset ti Barangay 10, San Paulo iti ili ti San Nicolas.
Nabigbig ti biktima a ni Mark Miguel Agasid, agtawen ti 34, naasawaan idinto a ti suspek ket ni Kenneth Paguirigan, agtawen ti 34, maysa a tricycle driver awanan ti asawa ken agpada dagitoy a residente iti Barangay 11, San Fernando iti nasao met laeng nga ili.
Segun kenni Police Major Eduardo Santos, ti chief of police ti Philippine National Police iti ili ti San Nicolas, adda iti maysa a minatayan ti biktima idi simmangpet ti suspek ken ditoy a timpuar ti nabara a saan a panagkinnaawatan gapo ta rumrumuar a ti dati a live-in partner ti suspek ket isun ti kadendenna ita ti biktima.
Gapo iti daytoy, pinaputokan ti suspek ti biktima ken naggubal dagitoy agingga nga intuloy a pinalto-paltoganem ti biktima.
Dagus a naglibas ti suspek ngem natiliw met laeng daytoy iti Barangay 16 iti nasao nga ili babaen iti hot pursuit operation ken narekobre met laeng ti inusar na kalibre 38 a paltog nga inpurwak na iti piskarya.
Naamoan nga adda ti ikot a kutsilyo ti biktima ngem saan na a nausar daytoy.
Mainaig iti daytoy, kunana nga adda dagiti testigo a nangitudo a mismo iti suspek.
Kabayatanna, love triangle ti makitkita a rason ti nasao a palltog.
Iti agdama, maisagsaganan ti kaso a murder a maipila iti nadakamat a suspek.
