LAOAG CITY – Natay ti maysa a lalaki kalpasan a napaltugan iti Sitio Pat-patani, Brgy. Bato iti ili ti Badoc.
Nabigbig ti biktima a ni Gilbert Ibea y Torrado, agtawen ti 36, naasawaan, welder ken residente iti Brgy. Barbar iti ili ti Pinili idinto a ti maitudtudo a suspek ket ni Ernesto Rosaro aka “Gatto” “erning”.
Iti inisyal nga imbestigasyon dagiti otoridad, napan nagala ti biktima kadwa na ti anak na a lalaki ti “abal-abal” iti paset ti Badoc River.
Naamoan a kabayatan ti panagal-ala dagiti agama ti “abal-abal” ket maipagarop a bigla lattan a pinaltugan ti suspek ti biktima a nakatamaan ti barukong na a nagresulta ti pannakatay na.
Dagus a napan nagpatulong ti anak ti biktima iti lolo na idinto a ti suspek ket insigida a nagtalapwagaw iti saan a masinunuo a direksyon bitbit na ti inusar na a paltog ngem natiliw met laeng.
Agtultuloy ti naiget nga imbestigasyon dagiti otoridad tapno maamoan ti motibo ken namonganayan iti napamasak a pammaltog ngem rumrumuar nga adan ti dati a susik ti biktima ken suspek.
