LAOAG CITY – Dead on arrival iti ospital ti maysa a lalaki kalpasan a nagdinnungpar ti motorsiklo ken van iti paset ti Brgy. 21-San Marcos iti ili ti Sarrat.
Binigbig ni PMaj. Hermy Ancheta, ti hepe ti PNP Sarrat ti nangiturong iti motorsiklo nga sniper nga agtawen ti 23, awanan asawa ken residente iti Brgy. Bacsil iti ili ti Dingras.
Kabayatanna, kuna na a ti nangiturong ti L300 van ket atawen ti 36, addaan ti live-in partner ken residente iti Brgy. Ferdinand iti ili ti Marcos.
Inbatad ni PMaj. Ancheta a basar iti naiyuswat nga imbestigasyon, bayat nga agpapaamianan ti motorsiklo ket nag-overtake iti truck a sarsarunuen na.
Kuna na a dita metten a saan na a napakadakan nga adda ti sumungsungad a van ken isu ti puon a nadungpar na daytoy.
Inpakaammo na a gapu iti kapigsa ti impact ket naipurwak ti motorsiklo pakairamanan ti driver.
Gapu iti daytoy, inbatad ni PMaj. Ancheta a nagsagaba ti nakana a sugat iti ulo ti nangituron ti motorsiklo ken dagus a naitaray iti Dingras District Hospital ngem naideklara a dead on arrival.
Kabayatanna, nagsagaba laeng ti sugat iti nagduduma a paset ti bagi ti driver ti van.
Manamnama nga agsasarita ti partido ti pimmusay a biktima ken ti driver ti van ita nga aldaw.
Saan met pay masinunuo dagiti otoridad nu adda iti impluwensya ti nasanger ti driver ti motorsiklo idi napasamak ti desgrasya.
