LAOAG CITY – Tiniliw dagiti kameng ti Provincial Drug Enforcement Unit (PDEU) ken ti PNP-Solsona ti maysa a lalaki iti ili ti Solsona gapu iti panagikot na paltog ken sumagmamano a sachet a naglaon ti maipagarop a shabu.
Segun iti PDEU, nakaawat da ti impormasyon nga adda ti maysa a lalaki nga adda ti ikot na a paltog iti paset ti Barangay Juan iti ili ti Solsona.
Iti panagresponde dagiti otoridad ket ditoy a natiliw da ni Roderick de Fiesta y Savellano, agtawen ti 36, self-employed, naasawaan, maysa a drug surenderee ken residente iti Barangay Barcelona iti ili ti Solsona.
Inbatad ti PDEU nga iti panangkapkap da iti suspek ket nakumpiskar da ti kalibre 45 a paltog nga addaan ti uppat a bala ken naalaan da pay ti tallo a sachet a naglaon ti maipagarop a shabu nga agbalor ti 13,600 a pisos.
Naamoan a ti suspek ket maibilang kas High Value Individual iti babaen ti Coplan Lacub ken adda iti Top 10 Regional List ti drug personality ti PNP-Region 1.
Nagtalinaed ti suspek iti kustodyar ti PDEU ken manamnama a mapilaan ti maiyannatop a kaso.
