LAOAG CITY – Ballaigi a natiliw ti maysa a lalaki iti ciudad ti Laoag kalpasan ti drug buy bust operation nga insayangkat dagiti kameng ti Philippine National Police iti ciudad ti Laoag.
Maipagarop a linakuan ti lalaki ti nagpammarang a buyer a polis ti maysa a sachet ti shabu, malaksid iti dayta ket adda pay nakumpiskar a dua a sachet ti shabu iti uneg ti pitaka ti nasao a suspek.
Nabigbig ti suspek a ni Joshua Asuncion, agtawen 24, taga-Antipolo City ngem agdama nga agnanaed iti barangay 9 iti ili ti San Nicolas, ken agtrabtrabaho kas store associate iti maysa a pasdek negosyo.
Segun iti suspek, itay pay laeng aldaw nga adda maipagarop a nang-arestar kenkuana iti Barangay 15 iti ciudad ti Laoag a saan a nabigbig ken ditoy a maipagarop a pinosasan da.
Mainaig iti daytoy, naglikodan ti suspek a kukua na dagiti nakumpiskar a gatad ti kuarta pakairamanan ti nasao a shabu.
Kasta pay a naglikodan na nga agus-usar ken aglaklako iti mapappapati a shabu.
Inlawlawag na nga awan ti karga ti wallet na ngem idi kinompiskar dagiti kameng ti polis ti pitaka na ket ditoy nga adda kuarta ken dua a sachet ti shabu a linaon na.
Imbatad pay ti suspek nga awan ti aniaman a rekord na seknan iti shabu ken saan a drug surrenderee daytoy.
Naammuan a ti suspek ket karaman iti street level individual.
Kabayatanna, agtultuloy met ti imbestigasyon dagiti kameng ti polisya mainig iti daytoy.
