LAOAG CITY – Balligi a natiliw ti maysa a lalaki iti naiyuswat a drug buybust operation iti Brgy. 28 ditoy siudad ti Laoag.
Nabigbig ti subject ti operasyon a ni Carl Joseph Baroga, construction worker ken residente iti ili ti San Nicolas.
Narekobre dagiti otoridad iti ikot daytoy ti dua a sachet ti maatap a marijuana pakairamanan ti naaramat iti operasyon a maysa a sachet nga agbalor iti 500 a pisos, nagduduma a denominasyon ti kwarta, cellphone, headset ken dadduma pay.
Kabayatanna, inpetteng ni Baroga a naimula laeng kenkuana dagiti narekobre a maatap a marijuana.
Inlawlawag na nga idi kalman ti rabii ket mapanda koma mangan kaduana ti maysa kadagiti karruba na.
Nu pay kasta, bayat a magmagna dagitoy iti plaza ti San Nicolas ket adda ti nangsalangad kadakuada a nakalugan iti brown nga SUV ken dagitoy ti nangimbitar kadakuada a mapan mangan.
Kuna na a simmurot da iti kaduana ngem naidissaag ti maysa iti asideg ti dakkkel a mall iti ili ti San Nicolas.
Kalpasanna ket naibati daytoy iti lugan ken nagturong da iti pagkaserraan dagiti inpagarup na a pulis ken innala dagitoy ti gamit na.
Inbatad na a nagpatnag nga adda iti kasera ken itay agarop alas-otso itay bigat ket naipan iti Brgy. 28 ditoy siudad ken dita a kellaat a naposasan ken naiyuswat ti operasyon.
Innayun ni Baroga nga awan naaramidan na idi nakikuyog kadagiti nakalugan ti SUV gapu iti arig a pannangtenngel da kenkuana.
Patienna a namulaan laeng ti iligal a droga gapu ta saan pay a pulos a nagusar wenno naglako.
