LAOAG CITY – Natiliw ti maysa a lalaki iti naiyuswat a drug buy-bust operation iti Barangay Vira ditoy ciudad ti Laoag.
Nabigbig ti subject ti operasyon a ni Gino Sia, maibilang kas street level individual ken residente iti nadakamat metlaeng a barangay.
Kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos.
Naala pay iti ikot ti suspek ti maysa a dakkel a sachet a naglaon ti tallo a babassit a sachet a naglaon metlaeng ti maipagarop a shabu.
Basar kadagiti otoridad, malaksid iti maipagarop a panaglaklako ti illegal a droga ti suspek ket adda pay ti nakairamramanan na a kaso kas ti panagtakaw wenno akyat-bahay.
Kabayatanna, inpetteng ti suspek a saanna a bagi dagiti naala nga ebidensya kontra kenkuana.
