LAOAG CITY – Balligi ti naiyuswat a drug buy bust operation iti Sitio Lusong, Barangay 29 ditoy ciudad ti Laoag a nakatiliwan ti maysa a lalaki.
Nabigbig ti subject ti operasyon a ni John Raymond Abab, agtawen ti 47 ken residente iti Barangay 17 ditoy ciudad.
Nakumpsikar iti operasyon ti maysa a kalibre 38 a paltog, uppat a bala, ken 14 a sachet ti maipagarop a droga, ken sangaribo a pisos a buybust money.
Naamoan a ni Abad ket karaman ti Top 10 drug personality iti Regional level ken miembro iti drug group nga agop-operar ditoy Ilocos Norte.
Ummunan nga inbatad ni Abad a saan a naglako ti iligal a droga ken napan iti Sitio Lusong iti nasao a barangay gapo ta agmula daytoy iti lote da.
Mainaig iti daytoy, kuna ni Police Major Christian Felix, deputy chief of police ti PNP-Laoag, ni Abad ket datin a natiliw gapo met laeng iti iligal a droga idi 2009 ngem na-acquit.
Nupay kasta, inbatad na nga iti panagmonmonitor da kenni Abad ket intultuloy na ti iligal nga aktibidad na agingga nga inwayat da ti operasyon.
Inlawlawag na a ni Abad ket maysa a van driver ken iti panagruwar na iti probinsya ket adda ti posibilidad na a gundawayan na met ti agibyahe iti iligal a droga.
Innayon na a ni Abad ket maibilang a notorious mainaig iti droga ngem awan met ti namonitor da nga adda ti pakainagan na iti gun for hire.
Kabayatanna, maisagsagana metten ti kaso a panaglabsing iti Section 5 ken Section 11 iti Republic Act 9165 wenno Comprehensive Dangerous Drugs Act of 2002 ken panagsalungasing iti Republic Act 10591 wenno Comprehensive Firearms and Ammunition Regulation Act.
