LAOAG CITY – Natukkol ti akinkannawan a luppo ti maysa a lalaki kalpasan a nadungpar daytoy ti maysa a toyota fortuner iti paset ti Brgy. 45-Tangid ditoy siudad.
Binigbig ni PCpl. Alexon Rosal iti PNP-Traffic Division ditoy siudad, ti biktima a nangiturong ti motorsiklo a ni Richard Andres Gramahe, agtawen ti 40, naasawaan ken residente iti Brgy. Balatong ditoy siudad idinto a ti nangiturong ni fortuner ket ni Maria Salome Agcaoli Geronimo, agtawen ti 45 ken residente iti Brgy. Rioeng ditoy siudad.
Inbatad na a bayat nga agpapaabagatan a direksyon ni Gramahe ket kellaat a dinungpar na ti fortuner nga agturong iti kapada a direksyon.
Gapu iti daytoy, kuna ni Rosal a timmama iti likod ti fortuner ni Gramahe isut gapo na a malaksid iti pannakatukkol ti luppo na ket nasugatan pay ti rupa na.
Naitaray ti biktima iti Laoag City General Hospital ditoy siudad para iti pannakataming na idinto a nagtalinaed iti kustodyar ti PNP ti nangiturong ti fortuner.
Naamoan nga adda iti impluwensya ti nasanger ti lalaki idi napasamak ti insidente.
