LAOAG CITY – Nadiskubre ti agruprupsan a bangkay ti maysa a lalaki iti mismo a kwarto na iti Sitio Sadiri, Brgy. 3, Loing iti ili ti Piddig.
Nabigbig daytoy a ni Maximino Cudal Jr. y Magno, agtawen ti 47, awanan ti asawa ken residente iti nadakamat a barangay.
Inbatad ni Police Capt. Rudy James Jacalne, ti chief of police iti ili ti Piddig, nagkedked ti pamilya ti biktima a maipadalan ti otopsiya ti bangkay na.
Inlawlawag na nga agtalek dagiti kabagyan ti biktima nga awan ti foul play iti napasamak no di ket mamati a pimmusay daytoy gapu kadagiti sagsagabaen na a sakit.
Naamoan a ti biktima ket addaan ti problema iti puso, acidic ken diabetes.
Immuna iti daytoy, naduktalan ti agruprupsan a bangkay ti biktima kalpasan a naangot ti nabangsit nga angot manipod iti balay ni Cudal.
