LAOAG CITY – Pimmusay ti maysa a lalaki kalpasan a nadesgrasya iti imanmaneho na a motorsiklo iti maysa nga accident-prone area signage iti national highway iti Brgy. Paltit iti ili ti Badoc.
Segun ken ni P/Cpt Elison Pasamonte, hepe ti Badoc Municipal Police Station, ti biktima ket agtawen 19, baro ken risidente iti Brgy La Virgen Milagrosa iti nadakamat nga ili.
Kinunana nga agarup alas 7:10 ti rabii idi Disiembre 25 ket adda ti nakaawatda iti tawag mainaig iti aksidente iti igid ti national highway iti nasao a lugar rason a dagus a nagresponde dagiti kameng ti Badoc Police pakairamana ti Bureau of Fire Protection.
Basar iti imbestigasion, bayat nga agpapaamianan ti motorsiklo iti highway ket napukawan ti kontrol ti biktima iti manibela rason a nadungparna ti signage warning ti mysa nga accident prone area.
Gapu iti daytoy, nagsagaba ti nakana a sugat ti biktima iti ulona ken iti nagduduma a paset ti bagina.
Nupay kasta, dagos a naitaray ti biktima iti balay pagagasan ngem naideklara daytoy a dead on arrival.
Naammoan a saan a nakasuot ti helmet ti biktima ken protective gear ti nadakamat a biktima.
