LAOAG CITY – Nagsagaba ti sugat iti ulo ti Grade 4 pupil nga agtawen ti siyam a babai kalpasan a pinang-or ti step grandfather na idiay Barangay Bulbulala, Pinili, Ilocos Norte.
Nabigbig ti suspek a ni Dennis Saludez y Baligat, agtawen ti 42, naasawaan, maysa a mannalon ken residente met laeng iti nasao a barangay.
Segun iti imbestigasyon, idi simmangpet ti biktima iti balay da ket kinomprontar ti nakainom a suspek ken inungtan na daytoy gapo ta pimmanaw ti ubing iti balay da a saan a nagpakada kenkuana.
Gapo iti daytoy, pinang-or ti suspek ti ulo ti biktima usar ti “balonet”, maysa nga improvised a kayo a door lock.
Kalpasan daytoy ket napan nagpatulong ti biktima kadagiti karruba na ken naitaray iti Karmelli Hospital iti Barangay Apatut Lubong iti nasao nga ili.
Iti agdama ket adda iti kustudiyar ti PNP-Pinili ti nasao a suspek.
