LAOAG CITY – Nakaliklik iti penggad ti maysa a lalaki gapo ta saan a natamaan kalpasan ti panangpaltog kenkuana ti pada na a lalaki idiay Barangay Zamboanga ditoy ciudad ti Laoag.
Nabigbig daytoy a ni Jeffrey Malasarte, 30, awanan ti asawa idinto a ti suspek ket ni Herwin Fruelda, 30, naasawaan, maysa a tricycle driver, agpada a residente iti nasao a barangay.
Segun kenni Police Major Adriano Licudan, ti deputy chief of police ti PNP-Laoag, basar ti palawag ti biktima ket inayaban na ken kinomprontar na ti suspek gapo ta maipagarop nga adda ti relasyon daytoy iti ikit na sakbay na a tinungpa.
Inbatad na a kalpasan ti sumagmamano a minutos ken bayat nga agturong ti suspek iti Sitio Dos iti nasao a barangay a nakalugan ti tricycle kadwa na da George Reyes, 40; Wilfredo Balanay Jr., 30, agpada a residente iti nasao a lugar ken ni Arnel Concepcion residente iti Barangay Lumbad iti ili ti Dingras ket nangala ti saan pay a naterminar a paltog iti uneg tu lugan na ken pinaltogan na ti biktima ngem saan a natamaan.
Nupay kasta, pinaltogan manen ti suspek ti biktima ngem saan latta a natamaan rason a dagus a naglemmeng iti puon ti mangga idinto a ti suspek ket naglibas.
Kabayatanna, sumango ti suspek ti kaso nga attempted homicide.
