LAOAG CITY – Nagtalinaed nga unconscious wenno awan poot na ti nangiturong ti maysa a motorsiklo a MIO kalpasan ti napasamak a desgrasya iti paset ti Barangay 24, Nagrebcan idiay ili ti San Nicolas.
Binigbig ni Police Corporal Sonny Cuaresma Jr. iti PNP iti ili ti San Nicolas a ni Rommel Lumabao y Rumbaoa, agtawen iti 44 ken residente iti Barangay 8 iti nasao nga ili.
Inbatad na nga iti imbestigasyon da, bayat ti panagpadpadaya a direksyon ti motorsiklo ket nadungpar na ni Genaro Batangan y Batangan, agtawen iti 51, taga Barangay 24 iti met laeng ili ti San Nicolas ngem agdama nga agbanbantay kadagiti lako a furnitures iti nasao a lugar.
Agpada a naitaray dagiti dua iti ospital ngem agpapan ita ket awan pay ti poot ni Lumabao idinto a ni Batangan ket addan ti natalged a kasasaad.
Iti agdama, agtultuloy iti imbestigasyon dagiti otoridad mainaig iti napasamak nga insidente.
