LAOAG CITY – Inlawlawag ni Atty. Juanito Antonio dagiti proseso iti search warrant operation.
Inpakaammona a masapol nga umuna nga agaplikar dagiti otoridad iti husgado ken agpaaramid ti affidavit para iti search warrant agingga a mangikeddeng ti korte iti aldaw a panakaiwayat ti operasyon.
Inpetteng ni Atty. Antonio a ti search warrant ket maysa a proseso tapno valid ti maiwayat nga operasyon.
Innayon na pay nga iti search warrant ket masapol a nakailanad ditoy no siasinno ti pakaiwayatan ti operasyon, lugar wenno paset ti balay a pagsukimatan ken masapol a nakailanad no ana a banag ti sapolen dagiti otoridad.
Kabayatanna, inpaganetget ni Atty. Antonio a saan a mabalin nga adda ti umuna a sumrek iti balay a pakaiwayatan ti operasyon.
Maipalagip a namunganay daytoy nga isyu gapu pay laeng ti panaka-ibasura ti naipila a kaso kontra ken ni Mr. Joy Vergara iti ili ti Badoc a nakaiwayatan ti search warrant operation idi bulan ti Abril a nakakumpiskaran ti maatap a shabu ken granada.
