LAOAG CITY – Balligi ti pannakatiliw ti maysa a machine operator babaen iti entrapment operation nga inyuswat dagiti kameng ti PNP-Bacarra.
Nabigbig ti suspek a ni Mark Laurence Gapusan, agtawen ti 23, residente iti Barangay 11, Bulbulala iti ili ti Vintar.
Segun kenni Police Major Arnel Tabaog, chief of police ti PNP-Bacarra, nakikoordenar kadakuada ti manager ni Gapusan gapo ta adda ti mapukpukaw kadagiti stock da ti tela a para iti uniporme dagiti atleta.
Inlawlawag na a basar iti imbestigasyon da, sobraan ti suspek ti agiruar dagiti stock a tela nga isu ti ilako na.
Inbatad na ti maysa a bundle ti tela ket agbalor ti lima ribo a pisos ngem rumrumuar nga ilaklako laeng ni Gapusan ti tallo ribo a pisos nga isu ti nakakigtotan dagiti gimmatang.
Naamoan a dagiti gimmatang kenni Gapusan iti nalaklaka a balor na ket agam-ammo da iti manager wenno amo ti suspek.
Karaman kadagiti nakumpiskar ket dagiti uppat a bundle ti tela, 12 a ribo a pisos a buy-bust money.
Iti agdama, manamnama a mapilaan ti kaso a qualified theft ti nasao a suspek.
Kabayatanna, nagkedked met ni Gapusan nga agkomento mainaig iti daytoy ken nagtalinaed isuna iti PNP-Bacarra.
