LAOAG CITY – Inpakaamo ti maysa a nagannak iti Florentino Camaquin Integrated School iti ili ti Vintar nga ada iti maysa a maestra a maipagarup nga agsingir ti kontribusyon kadagiti estudyante.
Inbatad ti saanen a nagpabigbig a nagannak a dumawdawat ti nasao a maestra iti 400 pesos iti tunggal estudyante na a maipagarup a paggatang na iti telebisyon.
Segun kenkuana, ti nasao a maestra ket maysa a high school teacher.
Kabayatanna, iti panagturong ti team ti Bombo Radyo Laoag iti Florentino Camaquin Integrated School, inpalgak ni principal Amiel Dexter B. Sarmiento nga awan ti ammo na mainaig iti panagpakontribusyon iti maysa kadagiti mangisursuro iti nasao a pagadalan.
Inbatad na a saan na nga inpagarup nga adda ti mapasamak a panagsingir ti kontribusyon gapo ta kompleto ti pagadalan da kadagiti kagamitan nga mausar iti panagisuro pakairamanan ti telebisyon.
Innayon na pay a ti pagadalan ti rumbeng a mangited kadagiti kasapulan dagiti mangisursuro ken saan a dagiti estudyante ken nu aniaman ti plano dagitoy ket masapol a maipakaammo kenkuana sakbay a maiyimplimentar.
Kabayatanna, inpanamnama met ni Sarmiento nga mangiyuswat ti imbestigasyon mainaig iti nasao a banag.
