LAOAG CITY – Kinondenar ni Mr. Zyrille Vince dela Cruz ti maipagarop a masagsagrap na ken dagiti co-teachers na nga agkakadakes a sarita manipud kenni Mrs. Eliza Vedania, School Principal IV ti San Nicolas National High School.
Segun kenni Dela Cruz, pabpabainan ni Vedania isuna ken dagiti dadduma pay iti sangwanan pay a mismo dagiti estudyante na.
Inlawlawag na a nasakit ti rikna na gapo kadagiti maipagarop nga agkakadakes a sarita ken aksyon iti uneg ti pagadalan ti nasao a principal.
Inadmitir ni Dela Cruz nga adda ti nagbasolan na ken maawat na ti maungtan ngem kunana a ti laeng kayat na ket saan nga iti sangwanan dagiti estudyante a mapagsasawan.
Nagkedked met ni Vedania a mangipaay ti naan-anay a detalye mainaig iti alegasyon ni Dela Cruz kontra kenkuna.
Nupay kasta, kuna laeng ni Vedania a saan nga agpayso ti akusayon ti mangisursuro ken adda ti maestro ken maestra a mangpaneknek nga awan ti madi nga ar-aramiden na kenni Dela Cruz.
Kabayatanna, inpetteng ni Mr. Mark Angelo Damo nga awan ti kinapudno dagiti alegasyon ti dela Cruz kontra kenni Vedania.
Segun kenni Damo, ni Dela Cruz ti ado ti atraso na iti nasao a pagadalan a mapaneknekan babaen kadagiti dokumento ken memos kas iti panaglabsing na iti no collection policy ken dadduma pay.
Malaksid iti daytoy, inakusaran pay ni Damo a maipagarop a tinakw ni Dela Cruz ti personal a kagamitan na ken ipadpadawat na.
Mainaig iti daytoy, kuna ni Damo a maisagsaganan ti ipila na a reklamo a panagtatakaw kontra kenni Dela Cruz.
Kabayatanna, kuna ni Mr. Rosario Ramos nga agung-unget met ni Vedania ngem awan paulos ti masaiwang na a “torpe” a kas iti alegasyon ni Dela Cruz.
Inbatad na a dagiti alegasyon ni Dela Cruz ket pammabalaw laeng gapo iti maipagarop a personal na a gura gapo ta madaldalusan dagiti madi nga aramid na iti pagadalan.
Ni Dela Cruz ket maak-akusaran pay a maipagarop a nangiyawid ti printer a kukua ti pagadalan.
Sinungbatan met ni dela Cruz kontra iti alegasyon kenkuana a maipagarop nga innala na ti printer a kukua ti pagadalan.
Segun kenni Dela Cruz, inbatad kenkuana ni Mrs. Alison Agustin a personal a gamit na ti printer nga isu met ti sarita a tinakderan na rason nga adda kenkuana iti agdama.
Inlawlawag na a ti ammo na ket personal a kukua ni Agustin ti printer ken adda daytoy iti likod ti lugan na ken saan a maus-usar nga isu ti inbatad na kenni Mrs. Eliza Vedania idi nasaludsod kenkuana.
Inpetteng na nga idi nakiddaw kenkuana a maisubli iti uneg ti pagadalan ti printer ket inaramid na daytoy ket adda ti mangipaneknek.
Naamoan a ti ink ti printer ket it-ited ti pagadalan.
