LAOAG CITY – Inpakaammo ni Fire Senior Inspector Ronald Castillo, ti fire marshal ditoy siudad ti Laoag a sakbay a natapugan ti tawen 2022 ket maysa a makeshift house ti nauram iti Brgy. Caaoacan ditoy siudad.
Segun ken ni Castillo, pasado 5:40 iti malem idi kalman a nakaawat ti tawag ti opisina da mainaig iti mapaspasamak nga uram iti nasao a barangay.
Kuna a bayat ti panagresponde da ket dakkelen ti apoy iti maur-uram a pagtaengan.
Inbatad na a basar iti inisyal a resulta ti panagimbestigarda ket namunganay ti apoy iti naiwawa a kwitis.
Inlawlawagna a gapu ta naaramid ti pagtaengan babaen kadagiti materyales nga alisto a mauram ket alisto a nagkayam-kam ti apoy.
Kabayatanna, awan ti nairekord a nadangran iti nasao nga insidente ken mapatta-patta nga umabot 150,000 ti balor dagiti nadadael.
Malaksid iti pannakauram ti maysa a pagtaengan ket adda pay dagiti insidente ti grassfire ditoy siudad gapu met laeng iti paputok.
