LAOAG CITY – Binagko-bagkong iti naminwalo a daras ti maysa a mangisursuro ti agtawen ti walo nga ubing a babai iti elementary school iti South Korea, ti nakaam-ames nga insidente a nakakigtotan ti nasao a pagilian.
Ti mangisursuro a maysa a babai, agtawen ti 40 ket inadmitir na a mismo ti panangbagko-bagkong na iti ubing iti ciudad ti Daejeon.
Basar iti report, nakita ti biktima a madigdigusen ti bukod na a dara iti school building ken iti pannakaitaray na it ospital ket naideklarar a pimmusayen.
Iti panagresponde dagiti otoridad ket nakita da ti suspek iti mismo nga abay ti biktima nga adda met ti sugatna, ngem atapen dagiti otoridad nga isuna metlaeng ti nangdangran iti bukod na a bagi.
Mainaig iti daytoy, inbilin ni South Korean acting president Choi Sang-mok ti pannakaimbestigar a naimbag ti nasao a pasamak ken ginutigot na dagiti otoridad nga iyimplementar da ti maiyannatop nga addang tapno masigurado a saanen a maulit ti insidente.
Kabayatanna, kalpasan a nagwaras ti inaramid ti mangisursuro iti biktima ket naruay a tattao dagiti napan nagikabil kadagiti sabsabong ken stuffed doll iti gate ti nadakamat a pagadalan.
Naamoan nga idi Disyembre 9 iti napalabas a tawen ket nagkiddaw ti mangisursuro ti innem a bolan a bakasyon gapu ta agpaspasar ti depresyon ngem nagsubli iti pagadalan kalpasan laeng ti 20 nga aldaw kalpasan nga inpasigurado ti doctor na a kabaelan nan ti agtrabaho.
