LAOAG CITY – Nabirukanen ti bangka a nagluganan ti mapukpukaw a mangngalap a ni John Mike Ranada, agtawen ti 34, residente iti Metro Gabu ditoy ciudad ti Laoag.
Daytoy ti inbatad ni Vice Mayor Carlos Fariñas kalpasan ti panagsawar na iti baybay babaen ti panaglugan na iti jetski da manipod iti ili ti Paoay agingga iti nagbedngan ti ciudad ti Laoag ken ili ti Bacarra.
Segun iti bise mayor, nakita ti nagluganan a bangka ni Ranada iti tengnga ti baybay.
Innayon na a nakikoordinaren iti Philippine Coastguard tapno tumulong iti agtultuloy a panagbiruk ken ni Ranada.
Mangnamnama ni Fariñas nga iti baet nga addan ti sumagmamano nga oras a mapukpukaw ni Ranada ket mabirukan paylaeng a sibibiag.
Immapela met ni Fariñas kadagiti mangngalap a no madlaw a nadawel ti baybay ket saanen a tumappog pay tapno maliklikan ti possible a pannakadesgrasya ken pannakairisgo ti biag.
Kabayatanna, emosyonal a nagpanawagan ti ina ni Ranada a ni Mrs. Evangeline Ranada kadagiti siasinno man a makakitkita iti anak na nga ipakaammo da koma a dagus kadakuada.
Inpakaammo na a ti mapukpukaw a mangngalap ket maikadwa nga anak na ken nabayagen a trabaho na ti agkalap iti baybay ngem ita paylaeng a nadesgrasya kabayatan ti papanna panagkalap.
Mainaig iti daytoy, inpakaammo ni Police Major Mark Lester Uminyad, ti mangidadaulo iti Maritime Ilocos Norte nga adda ti inparuk-at da a gale warning idi kalman nga awan paylaeng dagiti mapan agkalap gapu ta kalepleppas ti iduduprak ti bagyo Karding.
Nupay kasta, masdaaw ni Uminyad gapu ta adda latta dagiti napan nagkalap iti baet a nadawel paylaeng ti baybay.
Iti baet daytoy, inbatad na a nakikoordinar dan kadagiti mabalin da a katulungan tapno mapan mangbiruk iti mapukpukaw a mangngalap.
