LAOAG CITY – Nasugatan ti maysa a mannalon kalpasan a napaltogan iti Barangay Baresbes iti ili ti Dingras.
Segun kenni Police Major Julius Basallo, ti chief of police ti PNP-Dingras, ti biktima ket agtawen ti 28, naasawaan, maysa a mannalon ken residente iti nadakamat a barangay.
Iti inisyal nga imbestigasyon ti PNP-Dingras, idi alas-otso idi rabii ket mangmangan ti biktima iti ruwar ti pagtaengan da idi adda ti immasideg kenkuana a lalaki ken kellaat lattan a pinaltogan na daytoy.
Gapo iti daytoy, natamaan ti tengnged ti nasao a biktima, ken saan met pay a nadeterminar no anya a paltog ti inusar ti suspek.
Dagus met a naitaray iti Rural Health Unit (RHU) iti ili ti Solsona negm naiyakar iti Mariano Marcos Memorial Hospital and Medical Center iti ciudad ti Batac ken addan iti natalged a kasasaad.
Iti agdama, awan pay ti maestablisar ti PNP a motibo iti pammaltog ken agtultuloy ti naun-uneg nga imbestigasyon da.
