LAOAG CITY – Inpakaammo ni Pol. Cpl. Paul Jay Rosete, ti imbestigador iti PNP ditoy siudad a maysa a lalaki ti natay kalpasan a nagbekkel.
Segun ken ni Rosete, ti biktima ket agtawen ti 32, awanan ti asawa, mannalon ken residente ditoy siudad.
Inbatad na a basar iti naiyuswat nga imbestigasyon, nakita ti ikit ti biktima a nakabitin ken awanen ti biag daytoy iti puon ti salamagi nga adda iti likod ti pagtaenganda.
Kabayatanna, kuna na nga awan ti nakita a suicide note ken awan ti madakdakamat ti biktima a problema iti pamilya na.
Rumrumuar a dua nga oras ti napalabas sakbay a nakita ti ti bangkay ti biktima ken naduktalan nga asphyxia secondary to hanging ti nangitunda ti pannakatay daytoy.
