LAOAG CITY – Inbatad ni P/Lt/Col Roldan Suitos, hepe ti Philippine National Police iti ili ti Bacarra, a nagreklamo ti maysa a mannalon kadakuada gapu iti maipagarup a namin ado a daras nga inasok ti maysa met laeng a mannalon ti paltog kenkuana.
Nabigbig ti biktima nga adda iti umno a tawen, naasawaan, mannalon, ken residente iti Brgy. 40 Buyon iti nadakamat nga ili, kabayatan a ti suspek ket agtawen ti 59, naasawaan, negosiante, ken residente iti Brgy. 14 San Gabriel II iti ili ti Bacarra.
Segun kenkuna, mapilaan ti kaso a grave threat ti akusado ngem pinagbalin ti prosecutor office iti nadakamat nga ili a light threat ti nasao nga insidente, rason a maiyendorso daytoy nga ummuna iti uneg ti barangay.
Kinunana a namunganay ti saan a panagkinaawatan dagiti dua a mannalon ket simmarungkar ti biktima iti talonna a masarakan iti Brgy. 40 Buyon no sadinno nasdaaw daytoy kalpasan a natakuatanna nga inasak ti kalding a kukua ti suspek dagiti mulana a nateng.
Mainaig iti daytoy, nakumpiskar dagiti otoridad ti paltog ti suspek ken nai-surrender daytoy iti biang ti crime laboratory para iti ballistic examination.
Nupay kasta ket kumpleto ti dokumento ti paltog ti suspek ken no mapaneknekan a paneknekan nga inusar ti supek a kas pangta ket mabalin nga agtungpal daytoy iti kanayonan a kaso kontra iti suspek.
Innayonna a no mapaneknekan a pudno ti alegasion ket nakadepende no ania ti pangnunumoanda iti barangay ti agbalin nga addang ti Philippine National Police iti nasao nga ili.
Kabayatanna, nagpalagip ni Suitos kadagiti umili a siguraduenda a nakatali dagiti dingwenda tapno saan a mangpataud iti parikut kadagiti kabarangayan.
