LAOAG CITY – Desidido ni Mr. Rosendo Mandac iti Barangay Casili ditoy ciudad ti Laoag a mangipila ti reklamo kontra kenni Joseph Alipino, maysa a lupon tagapamayapa ken ti ama na a ni Adolfo Alipio.
Daytoy ket kalpasan ti maipagarop a panangkamat dagiti agama kenkuana bayat a naka-iggem ti tabas gapo iti isyu ti panagpadanom iti kataltalunan.
Ummuna iti daytoy, kuna ni Mandac nga idi Domingo ket adda ti danom para iti talon da ket gapo ta nakita na nga adda ti danom nga agay-ayos iti irigasyon ket linukatan na ti padawang na tapno sumrek ti danom iti talon na.
Nupay kasta, kunana nga adda metten ni Joseph ken sinerraan na daytoy tapno iti talon na a mismo ti pagturungan ti danom, ken naulit pay daytoy agingga a binaybay-an na lattan.
Segun kenni Mandac, idi agawiden ken nalpas metten ni Adolfo iti trabaho na iti talon ket kinasarita da nga iturong da pay laeng ti danom iti talon da tapno makaparaep da ken immanugot met ti ama nga Alipio.
Inlawlawag ni Mandac nga idi agawid kuman a nakalugan iti tricycle ket nasabat na dagiti agama nga Alipio ken kimmarit dagitoy agingga nga inkamat da ti iggem da a tabas.
Gapo iti daytoy, pinaspasan na a pinataray ti tricycle na ken malabsan na ti grupo dagiti opisyal ti barangay nga agbanbantay ngem maipagarop a saan a pinarsagdeng ti kapitan dagiti agama nga Alipio nga isu ti nakaiggem ti tabas.
Maluksaw ni Mandac gapo ta imbes a dagiti agama ket anawaen ti kapitan ket isuna a saan nga agun-uni ti pagsarsardengan da tapno saan a kumaro ti saan a panagkinnaawatan.
Karaman kadagiti binigbig na a nakaimatang nga opisyal ti barangay ket ni Kapitan Wenceslao Patricio, Kagawad Joseph Cariño, Kagawad Jomar Manubag, dua a tanod ken dadduma pay.
Kalpasan daytoy ket nagkamang da iti PNP ngem naibalakad a masapol a matratar pay laeng iti Barangay, ken napan da pay nagreport iti DILG.
Kabayatanna, inlawlawag ni Kagawad Joseph Cariño, chairman ti Peace and Order Committee iti Barangay Casili ditoy ciudad ti Laoag no anya ti napasamak iti nagbaetan ni Joseph Alipino, maysa a lupon tagapamayapa ken ti ama na a ni Adolfo Alipio ken ni Mr. Rosendo Mandac.
Segun kenni Cariño, nakita na a sumalog ni Mandac ken masabat na dagiti agama nga Alipio isut gapo na a pinarsadeng isuna ti kapitan tapno saan da nga agriri.
Inbatad na a saan met a natuloy ni Mandac ngem nagsao-sao rason a nakapungtot a nangitunda ti panangkamat ni Joseph kenkuana, isut gapo na a nagpataray ni Mandac.
Kunana a timmawag ni Mandac iti pamilya na ken maipagarop a ti inbaga na ket nakabkabil daytoy iti laksid nga awan met ti napaspasamak a kastoy.
Kalpasan daytoy ket napan iti lokasyon da ti pamilya ni Mandac ken ditoy a maipagarop a nagsao ti dakes ken kumarit ni Mandac.
Inadmitir na a nakasao ti dakes gapo iti pungtot na ken gapo ta saan da a maanawa dagiti dua a partido.
Manamnama na agsasarita da Mandac ken dagiti agama nga Alipio intono bigat.
