LAOAG CITY – Nagsagaba ti sugat ti akin-kannigid a lapayag ti maysa a lalaki kalpasan a tinagbat ti pagayam na a kinainuman na iti Barangay Subec iti ili ti Pagudpud.
Nabigbig ti biktima a ni Ronald Mariano y Arzaga, agtawen ti 42, awanan ti asawa, mannalon idinto a ti suspek ket ni Augustus Gillera y Moises, agtawen ti 40, awanan ti asawa, construction worker, agpada dagitoy a residente iti nadakamat a barangay.
Iti imbestigasyon dagiti kameng ti Philippine National Police iti ili ti Pagudpud, naginom dagiti dua iti balay ti biktima idi naaddaan da ti nabara a diskusyon.
Gapu iti daytoy, innala ti suspek ti kutsilyo ken isut ti inusar na a nangdangran iti biktima a nakasugatan ti akin-kannigid a lapayag ni Mariano.
Naitaray ti biktima iti ospital para iti naan-anay a pannakaagas na idinto a dagus a nagtalapuwagaw ti suspek kalpasan ti insidente ngem iti naiyuswat nga hot pursuit operation ket natiliw metlaeng dagiti otoridad.
Ti makitkita a motibo dagiti otoridad iti napasamak ket ti saan a panagkinnaawatan ti suspek ken biktima gapu iti nakaro a kinabartek da.
Nagtalinaed iti kustodyar dagiti otoridad ti suspek ken maiyus-uray ti desisyon ti biktima no ipursige na ti mangipila ti reklamo kontra ken ni Gillera gapu ta agpagayam dagitoy.
