LAOAG CITY – Nagballigi dagiti kameng ti Philippine National Police iti insayangkat da nga anti-illegal drug buy-bust operation iti ili ti Bacarra.
Segun ken ni Police Capt. Joseph Calderon, ti chief of police iti ili ti Bacarra, ti suspek ket agtawen ti 37, mannalon ken residente iti Barangay 21, Libtong iti nasao nga ili.
Inbatad ni Calderon a ti suspek ket drug surrenderer idi 2016 ken daytoy ket maibilang kas Street Level Individual.
Kuna na nga iti panangmonmonitor da iti suspek kalpasan a simmuko ket naduktalan da a nagsubli metlaeng iti illegal nga aktibidad na.
Inpetteng ni Calderon nga amin dagiti drug surrenderers ket agtultuloy latta ti panangmonitor da iti baet a dagitoy ket nalpasen ti idadalan da iti recovery program ken naikkan dan iti listaan dagiti addaan ti illegal nga aktibidad.
Mainaig iti daytoy, inpakaammo ni Calderon nga iti naisayangkat nga operasyon ket nakumpiskar iti ikot ti suspek iti 1.2 grams a maipagarop a shabu.
Innayon na nga iti panangimbestigar da iti suspek ket inbutaktak na dagiti kakadwa na no sadinno nga adda dagiti nadakamat na a nabayag metten a monmonitoren da idinto a dagiti dadduma ket baro laeng a nagan nga isu met ti sumaruno a monitoren ken i-validate da.
Nadakamat pay ni Calderon a naibaga kadakuada ti suspek dagiti lugar a pagal-alaan na kadagiti isupsuplay na a maipagarop nga illegal a droga iti ili ti Bacarra ngem nagkedked ti opisyal a nangipublikar gapu ta masapol a makikoordinar da paylaeng nga umuna kadagiti maseknan a municipal police stations.
Iti agdama, nagtalinaed ti suspek iti Philippine National Police kabayatan a maisagsagana ti pannakaipila ti reklamo kontra kenkuana, partikular ti panaglabsing ti Republic Act 9165 wenno Comprehensive Dangerous Drugs Act of 2002.
