LAOAG CITY – Naarestar ti maysa a mannalon kalpasan a nagaramat ti illegal a panagkalap iti ili ti Bacarra.
Daytoy ti imbatad ni Police Lt. William Sahagun, ti chief of police iti ili ti Bacarra.
Binigbig na ti suspek a ni Marlon Ildefonso, agtawen ti 59, naasawaan, mannalon ken residente iti Barangay Cabaraon iti nasao nga ili.
Inlawlawag ni Sahagun nga adda ti naawat da nga impormasyon manipud iti concerned citizen nga adda ti agisaysayangkat ti illegal a panagkalap iti Barangay Cabaraon, rason a nagresponde da a dagus iti nadakamat a lugar.
Inpakaammo na nga iti panagturong da iti lugar ket naaktwan da a mismo ti suspek a manarimaan ti panagkuryente na ti lames iti karayan.
Nakumpiskar dagiti otoridad ti electro fishing manipud iti suspek pakairamanan dagiti aparatos na 12 volts battery, 2 a pedaso ti electro fishing rod with net, ken nasurok a maysa kilo a nagduduma ti klase na a lames.
Iti agdama, nagtalinaed ti suspek iti Philippine National Police iti ili ti Bacarra ken manamnama a sumango ti kaso a panagsalungasing ti Republic Act 10654 wenno Actual use of electro fishing device.
