LAOAG CITY – Nasugatan ti maysa a mannalon gapo ti panangtagbat kenkuana ti pada na met laeng a mannalon iti Barangay Crispina iti ili ti Banna.
Nabigbig ti biktima a ni Jaypee Marcos y Taksita, agtawen ti 40 idinto a ti suspek ket ni Ernesto De Ocampo y Pascual, agtawen ti 60, balo, agpada a mannalon ken residente dagitoy iti nasao a barangay.
Segun iti Philippine National Police iti ili ti Banna, nakaawat da ti report idi rabii nga adda ti mapaspasamak a komosyon iti pagtaengan ti biktima.
Dagus met a nagresponde dagiti kameng ti Philippine National Police iti lugar ken iti inisyal a panagimbestigar da, adda ti saan a panagkinnawatan ti biktima ken suspek a nangitunda ti panagriri da.
Gapo iti daytoy, napan nangala ti suspek ti buneng ken inkamat na iti biktima agingga a nakadanon da iti bisinidad iti pagtaengan ti agnagan ti Vienbenido Pascual ken ditoy a tinagbat na iti saan pay a masinunuo a daras.
Naitaray met ti biktima iti Doña Josefa Edralin Marcos District Hospital iti ili ti Marcos gapo iti sinagaba na a sugat pakairamanan ti suspek a nasugatan met kabayatan ti komosyon.
Kalpasan daytoy, naipan ti suspek iti kwerpo ti pulisya pakairamanan ti buneng nga agatiddog ti 47 cm.
Naamoan a ti biktima ket suspek ket agpada nga adda iti impluwensya ti nasanger idi napasamak ti komosyon.
