LAOAG CITY – Natay ti maysa a mannalon kalpasan a nakuryente iti Brgy. Pasil, iti ili ti Paoay.
Nabigbig daytoy a ni Prudencio Valdez, agtawen ti 66, naasawaan, mannalon, ken residente iti nasao a barangay.
Basar iti imbestigasyon ti Philippine National Police Paoay, alas kuatro trenta itay malem, naimatangan ti maysa met laeng a mannalon a ni Franklin Taruma, agtawen ti 50 ken residente iti isu met laeng a barangay ni Valdez nga agpadpadanom iti mula na mais idi kellaat a natulid daytoy.
Ginandat pay ni Taruma a tulongan ti biktima ngem apaman a nakita na ti electric cable wire ti water pump supply nga adda iti abay ti biktima ket ditoy a nagkiddaw isuna ti tulong iti Barangay Kapitan iti nasao a barangay.
Insigida met a nagresponde dagiti otoridad ken dagiti kameng ti Rural Health Unit iit ili ti Paoay ngem basar iti attending physician, pimmusay ti biktima gapu iti electrocution.
