LAOAG CITY – Naarestar ti maysa a mannalon iti Brgy. Pagsanahan Sur iti ili ti Badoc.
Segun ken ni PMaj. Joseph Tayaban, Hepe ti Philippine National Police ili ti Badoc, daytoy ket kalpasan iti balligi a pannakaisayangkat ti Anti-Illegal Drug Buy-bust Operation.
Inbatadna a nabigbig ti subject ti operasion a ni Jomarie Cariaga y Yadao a.k.a Jomari Yadao, agtawen ti 22, awanan asawa ken residente idiay Brgy. Nagungburan, Sinait, Ilocos Sur.
Inlawlawagna a natiliw ti suspek kalpasan a naglako daytoy ti one heat-sealed transparent plastic sachet a naglaon ti maipagarup a shabu iti maysa a pulis a nagpammarang kas poseur-buyer.
Malaksid iti daytoy, kunana a nakumpiskar pay manipod iti suspek ti 11 a heat-sealed transparent plastic sachet a naglaon ti maatap a shabu a naikabil iti uneg ti blue mentos tin container pakairamanan ti maysa a pedaso ti sangaribu a pisos a nausar kas buy-bust money iti naisayangkat a transaksion.
Inpakaammo ni PMaj. Tayaban, agdagsen dagiti nakumpiskar nga items ti maysa a gramo nga agbalor ti 6,800 a pisos.
Inbagana a naarestar ti suspek babaen iti nagtitipon a pwersa ti PPDEU ken PIU kas lead units ti operasion pakairamanan ti Badoc Municipal Police Station.
Naammoan a maibilang ti nasao a suspek kas Street Level Individual ken agdama a nagtalinaed iti Ilocos Norte Police Provincial Office – Provincial Drug Enforcement Unit.
Kabayatanna, naimatangan dagiti Barangay Officials, Department of Justice Representative ti naisayangkat nga Anti-Illegal Drug Buy-bust Operation no sadino nagusar dagiti otoridad ti body-worn camera kabayatan ti operasion.
