LAOAG CITY – Nasuspenso ti maysa a meat vendor iti merkado publiko kalpasan a naduktalan a naglabsing iti pagannurutan ti lokal a gobierno iti ili ti Bacarra, kangrunaan na ti pannakaipawil nga agiserrek ti baboy iti nasao nga ili manipod iti sabali a lugar.
Segun ken ni Dr. Rufino Crabalho, ti Municipal Veterinary Officer iti ili ti Bacarra, naduktalan a dagiti parpartien a baboy dagiti partidor ti nasao a meat vendor ket naggapo iti ili ti Pasuquin.
Nagballaag ni Crabalho a no uliten pay ti nasao a meat vendor ti manglabsing iti pagannurutan iti ili ti Bacarra ket maminpinsanen a mapawilan nga aglako iti merkado publiko.
Immunan a nangiparuk-at ti local chief executive ti pammilin a masapol a dagiti laeng taraken a baboy iti ili ti Bacarra ti mailako iti merkado publiko tapno maliklika a maiserrek iti lugar ti African Swine Fever Virus.
Iti agdama, naiget ti panagmonitor dagiti opisyal ti barangay kadagiti maiserserrek a baboy iti nasao nga ili.
